Pönk eða diskó

Pönk eða diskó. Þetta skipti svo miklu máli á sínum tíma að það eru sennilega ekki ýkjur að halda því fram að menningarlegt borgarastríð hafi geisað í tónlistarheiminum á tímabili. En bestu pönkararnir, t.d. Clash, létu hvorki gagnrýnendur, hlustendur, né aðra tónlistarmenn setja sig á pólitískan bás og fóru að leika sér með diskóið. Lagið "Rock the Casbah" er gott dæmi um þetta. Bestu rokkararnir, t.d. Rolling Stones og Queen, lærðu af pönkinu. Lagið "Respectable" af Some Girls plötunni er dæmi frá Stones og "Sheer Heart Attack" af News of the World er dæmi frá Queen. Eftir á að hyggja voru hin hatrömmu átök um pönk og diskó að sumu leyti eins og rifrildið um hvort kók er betra en pepsí. Taktur er taktur. En orðið "skallapoppari" er frábært og ennþá betra þegar maður heyrir Jens Guð bera það fram.

Hver er hinn upprunalegi skallapoppari?

Rússnesk viska

Rússneski sendiherrann vitnar í rússneskt spakmæli, að það sé „mjög auðvelt að eyðileggja, en mjög erfitt að byggja.“ Hann og rússneskir ráðamenn ættu kannski að hlusta á visku eigin spakmæla áður en þeir predika hana yfir öðrum.

Segir ákvörðun Íslands hafa komið Rússum á óvart

Bojo

Boris Johnson, Bojo, er trúðaútgáfa af Winston Churchill. Ris hans var meira en vinir og óvinir hans bjuggust við en fall hans var mikið. Að lokum ákvað hann að ganga á dyr áður en honum yrði hent út. Partíið er búið.

Mun hann snúa aftur? Sennilega. Það er ekki auðvelt fyrir menn eins og hann, sem þrá stóra sviðið, að hætta í pólitík. Það var aldrei lognmolla í kringum Boris Johnson. Hann má eiga það.

Boris Johnson segir af sér þingmennsku

Aldrei nóg

Skyldi Trump hverntímann hugsa, "Æ, ég nenni þessu ekki lengur?" Sennilega ekki. Vesen er hans líf og yndi--og frá tilvistarlegu sjónarhorni er veran vesen. Það veit hann að öllum líkindum, þótt hann gefi sig ekki út fyrir að vera heimspekilega þenkjandi. Trump er ekki bara maður. Hann er táknmynd athafnamannsins sem gefst aldrei upp, er aldrei sáttur og fær aldrei nóg. Ef hann yrði forseti aftur væri það ekki nóg, því valdamesti einstaklingur heimsins, Bandaríkjaforseti, er langt frá því að vera alráður og það er pirrandi fyrir mann eins og hann. Það er smá Trump í okkur öllum hvort sem við viðurkennum það eða ekki.

Trump ákærður

Hvað er fjölbreytileiki?

"Fjölbreytt samfélag er betra samfélag," segir þingmaðurinn. Er þetta rétt? Raunverulegur fjölbreytileiki þýðir ekki bara að fólk hafi skoðanir sem frjálslyndu fólki líkar við. Raunverulegur fjölbreytileiki þýðir einnig að fólk hefur skoðanir sem frjálslynt fólk hefur óbeit á, t.d. trúarofstæki, kynþáttafordóma og hatur á samkynhneigð. Ef við trúum því virkilega að fjölbreytileiki sé góður í sjálfu sér verðum við að viðurkenna fordóma og hegðun sem við teljum skaðlega. Erum við reiðubúin til þess? Ef við erum það ekki eigum við ekki að segja að fjölbreytt samfélag sé gott samfélag. Við verðum að vanda okkur og skilgreina hvað við meinum og hvað við viljum í raun.

Mannréttindi eins skerði ekki mannréttindi annars

Tucker Carlson snýr aftur

Tucker Carlson sendi út sinn fyrsta þátt á Twitter eins og hann hafði lofað. Hann talaði um Pútín (góður gæi að hans mati) og Zelensky (vondi kallinn að hans mati) og sagði að það sé núna búið að sanna að geimverur séu til. Hann minnti meira á Glenn Beck, sem vinnur heldur ekki lengur fyrir FOX, en sjálfan sig þegar hann var upp á sitt besta. 

Þróun eða hnignun?

Fjölmiðlar, meðal annars Daily Mail, greina frá því að núna er hægt að fá ókeypis krakk-pípur í sjálfsölum í New York. Ekkert er ókeypis auðvitað. Skattborgarar splæsa. Nú verður hver að dæma fyrir sig. Er þetta jákvæð skapaðaminnkandi þróun? Eða er þetta skaðahvetjandi dæmi um hnignum vestrænnar siðmenningar?

Íslenskt mál og menning

Ég á bók sem heitir Íslenskir málshættir og snjallyrði. Nanna Rögnvaldardóttir valdi og Forlagið gaf út 2014. Hér eru þrír málshættir úr kaflanum Háð og illyrði:

Leiður kjaftur heldur sér aldrei aftur.

Skemmtileg rím (kjaftur-aftur).

Mikið raup fær spott í kaup.

Rímið svínvirkar (raup-kaup).

Spéleg spurning fær spottlegt andsvar.

Stundum á sá sem spyr kjánalega eða af illum hug skilið að fá á baukinn.

Sumir ætla að þvo sín lýti með lastmælum um aðra.

Þetta á sennilega aldrei betur við en núna. Stuðlunin gefur hugsuninni kraft (lýti-lastmælum).

 

Boð og bönn

Og núna er komin krafa inn á borð sömu skólayfirvalda í Utah-ríki, þar sem 60.7% íbúa voru mormónar árið 2019, um að banna Mormónsbók. The Guardian greinir frá þessu. Kvartað var yfir lýsingum á ofbeldi, þar á meðal orrustum, afhöfðunum og mannránum. Hvað gera mormónar þá?

Grunnskólar í Utah banna biblíuna

Fall forseta

Gerald R. Ford, sem var forseti Bandaríkjanna frá 1974 til 1977, er yfirleitt talinn klaufalegasti forseti Bandaríkjanna. Hann datt bæði upp og niður flugvélastiga. Á Íslandi var stundum sagt að hann gæti ekki gengið og tuggið tyggjugúmmí samtímis. Hann var auk þess ekki orðheppinn maður. Hann sagði til dæmis: "Ef Lincoln væri á lífi í dag myndi hann snúa sér við í gröfinni." En enginn er fullkominn.

Fallið gæti reynst Biden stórt