Tónlist

Arnar er spurður:

Þannig þú tel­ur ekki að það sé hug­sjón sem liggi að baki?

Hann svarar:

„Alls ekki. Þetta eru kald­ir Norður-Eng­lend­ing­ar og það er eng­inn ástríða eða hug­sjón­ir þarna á bak við. Þetta eru bara pen­ing­ar.“

Þessi dólgslega alhæfing sýnir hvað Arnar veit í raun lítið um tónlist.

 

„Engin ástríða eða hugsjónir þarna á bak við“

Kamala Harris

Flest af því sem Kamala Harris hefur sagt hingað til er annað hvort orðasalat eða sjálfshjálparfroða. En af og til glyttir í Karenar-týpu. Og svo virkar hún alltaf eins og hún hafi fengið sér tvö, þrjú hvítvínsglös með matnum. En hún er auðvitað betri en Biden. Ég hlakka til að sjá hana og Trump takast á. Það er um að gera að missa ekki af sjóinu!

Harris fer með sína mikilvægustu ræðu í kvöld

Framsækna réttarkerfið

Þetta er hið norræna réttarkerfi í hnotskurn. Allt í fínasta lagi! Við erum svo prógressív!

„Brautarpallsmorðinginn“ ákærður á ný

Nýjustu fréttir

Þetta mál er allt hið undarlegasta ens og nýjust fréttir sýna:

Beiðni ríkissaksóknara um að Helgi Magnús Gunnarsson vararíkissaksóknari skili lyklum að húsnæði embættisins, fartölvu og öðru slíku hefur verið afturkölluð. Helgi fékk tölvupóst þess efnis fyrir um fjórum klukkutímum en fékk svo annan fyrir hálftíma þar sem beiðnin var afturkölluð.

Heimild: Vísir

„Hún getur ekki svipt mig starfinu“

Frítt og gjaldfrjálst

"Frítt" og "gjaldfrjálst" þýðir í þessu samhengi að einhver annar þarf að borga fyrir það. Fyrst Vinstri grænir eru svona gjafmildir hvernig væri að þeir borguðu fyrir það sem þeir eru að lofa? En neiiiiiii! Það gengur auðvitað ekki!

Vilja gera getnaðarvarnir fríar fyrir ungt fólk

Öfgar

Fyrsta setning greinarinnar er lýsandi fyrir vandann sem fylgir því að reyna að stjórna skoðunum fólks: "Öfga­full kven­fyr­ir­litn­ing verður álit­in sem öfga­hyggja und­ir nýrri rík­is­stjórn í Bretlandi." Er "venjuleg" kvenfyrirlitning þá í lagi? Og hvernig eru þessi hugtök skilgreind? Það má færa góð rök fyrir því að öfgarnar felist í því að stjórnvöld ætli sér að stjórna hugsunum þegnanna. 

Kvenfyrirlitning verði skoðuð sem öfgar

Ályktanir Vinstri grænna

Eins og Sigurjón Þórðarson hefur bent á hér á Moggablogginu minnast Vinstri grænir ekki einu orði á Hamas í ályktun sinni um málefni Palestínu og stríðið á Gaza. Það er svolítið eins og að álykta um innrás Þjóðverja í Póland en minnast ekki á Nasistaflokkinn. Það sem er grátbroslegast við þessa ályktun er að ef Vinstri grænir eru að reyna að vinna sér inn prik hjá aðgerðasinnum þá er ályktunin ekki nægilega róttæk. Vinstri grænir þyrfðu í það minnsta að krefjast þess að Ísland slíti stjórnmálasambandi við Ísrael og beiti landið refsiaðgerðum. Allt annað er svik við málstaðinn að mati aðgerðasinna. En allar svona einhliða ályktanir eru auðvitað vatn á millu Hamas.

Vinstri græn fordæma ákvörðun Bjarna

Eyðilandið og tvær tegundir sósíalista

Eftirfarandi gefur góða innsýn í ákveðna tegund sósíalista:

Að lok­um ætla ég bara að segja: „Við ætl­um ekki að gef­ast upp. Við ætl­um ekki að leyfa frjáls­hyggj­unni að sigra,“ sagði Guðmund­ur á flokks­ráðsfund­in­um.

Guðmundur Ingi Guðbrandsson er starfandi formaður Vinstri grænna eftir að fyrrverandi formaður flokksins og fyrrverandi forsætisráðherra, Katrín Jakobsdóttir, sá sér leik á borði--því hún vissi sem var að flokkurinn og ríkisstjórnin sem hún stýrði voru dauðadæmd--og bauð sig fram til forseta. En hún hafði ekki erindi sem erfiði og biðlar nú til stuðningsfólks síns um að borga það sem eftir er af skuldum framboðsins. Sósíalistar og ófyrirleitnir kapítalistar eiga það sameiginlegt að það er alltaf einhver annar sem á að borga brúsann.

En hvað um það, Guðmundur Ingi er annars eðlis en Katrín. Þótt skriftin sé á veggnum og Vinstri grænir hafi verið vegnir á vogarskálum lýðræðisins og léttvægnir fundnir heldur Guðmundur Ingi áfram baráttunni við "frjálshyggjuna"--sem flestir eru nú hættir að æsa sig yfir því hún er í raun bara lögmálið um framboð og eftirspurn. Í stað þess að endurmeta stöðu flokksins sem hann stýrir heldur Guðmundur Ingi enn lengra út í eyðiland vinstrimennskunnar, þótt það þýði auðvitað bara endanlega tortímingu Vinstri grænna. Að sumu leyti getur maður ekki annað en dáðst að Guðmundi Inga fyrir að trúa á sósíalismann fram í rauðan dauðann, en aðalega er það sem hér er í gangi dæmi um náttúruval. Leiðtogar sem læra ekki af reynslunni og eru blindaðir af gjaldþrota hugmyndafræði geta ekki búist við öðru en ósigri á vígvelli stjórnmálanna.

„Ætlum ekki að leyfa frjálshyggjunni að sigra“

Hungur og hugmyndafræði

Hér er brot úr greininni:

Kim Jong Un, leiðtogi Norður-Kór­eu, lokaði landa­mær­um lands­ins kyrfi­lega í byrj­un heims­far­ald­urs­ins en tak­mörk­un­um fór aðeins að létta fyr­ir um ári síðan. Lok­un­in kom meðal ann­ars í veg fyr­ir að nauðsynja­vör­ur komust ekki inn í landið sem gerði það að verk­um að mik­ill mat­ar­skort­ur ríkti í land­inu.

Sósíalismi er alltaf ávísun á matarskort, vegna þess að alvöru sósíalistar hata markaðinn svo mikið að þeir vilja frekar að fólkið svelti en hætta á það að hugmyndafræði markaðarins grafi undan hugmyndafræði sósíalismans. Lenín og félagar lofuðu fólkinu brauði, landi og friði. En það sem fólkið fékk var hungursneyð, gúlög og borgarastyrjöld. En þetta var allt þess virði, að mati bolsévika, því það var nauðsynlegt til þess að sósíalisminn lifði af. Öllu sem var ekki sósíalismi varð að eyða. Kerfið var allt. Einstaklingurinn var ekkert. En þar sem sósíalismi er við völd fær flokkselítan alltaf nóg að borða. Það bregst ekki.

Norður-Kórea opnar landamærin fyrir ferðamenn

Gaslýsing um stjórnendur Gasa

Það væri hægt að skrifa heilt ritsafn um það sem er gagnrýnivert í málflutningi Magneu Marínóssdóttur, en ég ætla bara að benda á tvennt. Í greininni stendur:

„Síðan er það ekki fyrr en 2001 eft­ir árás Al-Qa­eda á tví­bura­t­urn­ana sem að Evr­ópu­sam­bandið skil­grein­ir Ham­as sem hryðju­verka­sveit.“

Seg­ir Magnea það aft­ur á móti ekki hafa fallið í góðan jarðveg og gerði Ham­as at­huga­semd við að hafa verið bætt á hryðju­verkalist­ann.

Einmitt. Það féll ekki í góðan jarðveg hjá hryðjuverkasamtökunum Hamas að vera bætt á hryðjuverkalistann. Sér hún ekki hvað þetta er grátbroslegt?

Þessi grein er ein löng gaslýsing um að hryðjuverkasamtökin Hamas séu ekki hryðjuverkasamtök. Evrópusambandið og Samtök Ameríkuríkja skilgreina Hamas sem hryðjuverkasamtök og það gera einnig eftirfarandi lönd: Ástralía, Kanada, Bandaríkin, Japan, Ísrael, Paragvæ, Nýja Sjáland, og Stóra Bretland og Norður Írland. 

„Fólk styður Hamas af mismunandi ástæðum“